開講有話，錯就要認，打就企定。鉛水風波搞到滿城風雨，港府係就係有認錯，不過講到責任咯喎，一如既往，推得就推，卸得就卸，所謂嘅調查純粹係掩人耳目咋。

嗱，繼水務署領導嘅專責小組發表調查報告之後，房委會相關委員會亦提交咗中期報告，同樣確證屋邨食水「鉛兇」來自水管焊料，仲承認房屋署監管不力添。可惜吖，整份報告對追究責任隻字不提，淨係提出多項補鑊措施，幾乎抄足水務署嘅報告，毫無新意。運輸及房屋局局長張炳良話就話相關部門已經作出反省，經一事長一智喎，但就拒絕負責。

咁都得？鉛水風波搞到咁大鑊，連調查報告都證實房屋署監管不力，依家一句反省就想過骨，仲有冇兒戲啲吖？問責制度豈不是蕩然無存？老實講，房委會嘅報告只不過係重彈舊調，講咗等於冇講，家陣大家最關注嘅係點樣追究責任，點樣清除禍根，房委會一味避重就輕，轉移焦點，擺明敷衍塞責，所謂經一事長一智，睇怕連細路仔都唔信。

唔怪得有立法會議員大表失望，形容呢份報告係「五無」：無真相、無跟進、無時間表、無問責、無懲處。其實計太一叮話齋，呢份報告固然係「五無」，港產官僚同樣係「五無」：無心、無肺、無德、無能、無承擔。

古人話，萬方有罪，罪在朕躬。港產官僚啱啱相反，淨係識得卸膊，唔係將責任推畀水喉匠，就係向承建商開刀，好似自己完全冇責任咁，問你服未。冇錯，焊料含鉛爆發食水危機，業界同承建商當然有不可推卸嘅責任，但當局監管失職又該當何罪吖？正如報告踢爆，房署官僚一直把關粗疏，既冇為新落成公屋抽驗食水含鉛量，亦冇檢驗接駁位有冇含鉛，簡直攞居民健康較飛，如果咁都唔使問責，又點令人信服吖。

所以話，港府冇嘢叻，最叻就係做騷。鉛水風波爆發之後，當局先後成立三個委員會調查，包括水務署、房委會、獨立調查委員會，係威係勢，似模似樣，其實到頭嚟又係得個吉，盞浪費時間嘅咋。

嗱，家陣水務署同房委會已先後發表報告，跟住就要睇獨立調查委員會點樣表演，會唔會又係表面文章呢？聽講要九個月後至有結果喎，等得嚟蚊都瞓蛇都死喇。正如有人話齋，反正係做騷，不如慳番好過喇！叮！