城中鏡：王曉初過檔 翻炒4G好橋
啱啱過去嘅十．一內地長假，咪以為人人有假放，據知內地三大電訊商──中移、中電信、聯通嘅財務部員工一律開OT無假放。有幾出奇？內地好少可十．一OT o架，即係等於香港聖誕同農曆新年冇假放咁緊要。為乜？就係為咗喺今個月底前搞掂鐵塔公司注資囉！
王曉初過檔聯通後，據聞佢翻炒喺中電信嗰套必殺技，就係要聯通加快4G建設。（資料圖片）
鐵塔公司要搞合組成立，搞咗年幾兩年都未得。成件事原意係想三大電訊商鐵塔資源共享，但因為資產估值過程複雜，遲遲未成事。嗱，明明話八月成立，之後又延到九月，依家十月喇，仲未掂，盤數睇怕要重新計過，故要開Turbo趕今個月搞掂。若然月底真係搞得切，電訊三雄嗰幾位新阿頭唔知會否嚟香港同大家見吓面呢？
講開啲阿頭，佢哋呢期亦為變陣忙爆。話說王曉初由中電信過檔聯通後，據聞佢翻炒喺中電信嗰套必殺技──就係要聯通加快4G建設。另外，又傳有阿頭「走出去」飛赴海外傾大Deal喎，係邊個？你估吓。
