城中鏡：六福CEO黃偉常 回味着「文化恤」
十．一內地長假，香港零售吹冷風，真係今時唔同往日。六福集團主席兼CEO黃偉常做咗珠寶業近半個世紀，都感慨舊時同依家「做法完全唔同」。黃主席憶述當年舖頭賣嘅款式唔使多，唔夠就訂造，「點似依家包羅萬有」，總之以前「吊支燈、擺條軌，幾件貨喺度就搞掂」。咪睇依家啲珠寶行店員西裝骨骨，黃主席笑言以前做sales「着條孖煙囪，着件文化恤」就搞掂。唔知黃主席講緊嘅「文化恤」係乜？即係依家講嘅Tee囉。
黃偉常（中）嘅仔女黃浩龍（右）同黃蘭詩細時已落舖。（資料圖片）
講番珠寶行，家陣六福要突圍吸客，喺Marketing方面都搞新意思，除贊助港姐后冠珠寶外，仲搞多瓣賽馬日招呼VIP客。六福執董Nancy黃蘭詩（即係黃主席位千金）話，公司宣傳費會着力控制喺總收入嘅百分之一，又話贊助賽馬日嘅花費合理。但六福有樣嘢冇變，就係代代都自細落舖幫手。黃主席細時就幫父母打理金行，而Nancy同哥哥黃浩龍都一樣。黃主席話會多啲畀仔女接手，讚佢哋處理一般業務得心應手，偶有突發事件先可能要開會傾。
