城中鏡：體育吸客拓商機
香港體育界早前舉行十．一酒會，港協暨奧委會會長Tim霍震霆同囝囝Eric霍啟山都係座上客。近日國際足協就球迷噓國歌罰咗香港足總，Tim就話被罰款近四萬已經算輕判。
霍震霆（右）與兒子霍啟山同為香港體育發展出謀獻計。
身為小型足球總會會長嘅霍啟山（右），經常親身落場。（資料圖片）
香港球迷於上月世界盃外圍賽中，為港隊揮旗打氣。（資料圖片）
Tim話噓國歌反映一個地方嘅文明程度，小部分人嘅不當行為會影響香港形象。佢話足球比賽強調公平競爭，希望球迷尊重，唔好令噓國歌變成一種風氣。Eric就明言係港足支持者，明白球迷只想有好波睇同埋多啲賽事。下個月又有中港足球大戰，但Eric預計噓國歌嘅行為難以避免，惟有呼籲球迷尊重國際足協嘅條例啦！
霍啟山倡「小球推動大球」
講開體育發展，Tim批評話政府唔應該輕視體育帶嚟嘅商機，好似北京冬奧咁，已經預計有八千億元商機。佢仲好勞氣話，次次叫政府申辦亞運，政府就以無場地為由拒絕。佢暗批政府只着重金融、地產，但係臨近地區就落力發展體育。又認為體育盛事能夠吸引遊客，若然單靠購物，遊客將會好快厭倦香港。
Eric就話希望提升香港足運水平，以改善運動員前景同收入。Eric除咗係足總董事，亦係小型足球總會（小總）會長。佢希望以「小球推動大球」，因為小型足球場地較多，易啲推廣令足球普及。
