救救可憐上水豬豬？有網民聲稱落馬洲村一家士多，餵養寵物豬當搖錢樹，聲稱原來的可愛小豬「寶寶」，長大成豬後仍屈居細豬欄，令腰身彎曲，甚至咳到噴血，慘變「愁爆」陰功豬。一宗網上控訴，揭露寶寶豬的身世，餵養寶寶的八旬婆婆否認虐畜的指控，寶寶經過專業人士檢查，證實健康無大礙，血漬亦非咳嗽所致，而是另有內情。
郭老太稱兒子疼惜寶寶豬，對虐豬指控感無辜。
寶寶終日被關放欄內，食飽就瞌眼瞓。
拍攝期間，寶寶突然擒上豬欄牆邊搶鏡，企定定拍照。
豬欄旁擺有寶寶豬仔錢罌，婆婆稱只是貪得意擺放，想賺錢都難。
士多位處落馬洲村村口，因屋後有荷花池及魚塘，又名荷花農莊。
有網民於社交網站發布相片，指上水一間士多養有一隻名為寶寶的寵物豬，店主在豬欄旁擺有錢箱收取捐款，但長大至今仍屈居三呎豬欄，導致「條腰已經變晒形，向下屈」 ，又謂「見到佢咳到噴晒血，我眼淚就立即滾動！」從相片中，可見寶寶向下彎的腰身，豬欄一角有血漬。
兒子放假帶豬暢泳
消息於網上發布後，網民關注寶寶「咳到嘔血」的情況，紛紛指摘士多只顧利用其賺錢。但原來「搖錢豬」實為落馬洲村一戶人的寵物豬，士多位於落馬洲村村口，是八十一歲郭老太的家，擺放寶寶豬仔錢罌純粹「貪得意」，該村原屬邊境禁區，早前才解禁，「都無乜人會嚟嘅，邊會賺到錢喎，個錢罌係畀啲小朋友放銀仔，話畀豬仔買嘢食！」
兩年前，有人將寶寶豬贈予婆婆四仔，當時寶寶只有三斤重，可輕易抱起，加上一張猶如臉譜的黑臉，外形趣致可愛；但時至今日，寶寶已長成四呎長、重一百五十斤的成年豬。婆婆表示，四仔疼錫寶寶，每逢周末便回來，帶寶寶散步或放入魚塘暢泳。
寶寶所住的豬欄，是四仔今年初搭建，雖然空間不算大，但足以讓牠在內轉動，又有家傭打理起居飲食。寶寶臉上布滿摺痕，令神情看似「愁爆」，但面對鏡頭表現興奮好奇，期間更突然擒上圍欄邊，扶着圍欄站立讓記者影相。郭老太稱，日前有幾個義工為寶寶檢查，「佢哋都話寶寶好健康，不過要減肥！」
原來，寶寶因為缺少運動，肚腩太大致腰骨向下彎曲。至於血漬非咳嗽所致，「係佢鹹濕呀，所以整損何Ｂ（下體）流血，佢係豬公嚟o架！」婆婆解釋，寶寶正值發情期，懷疑寶寶發情時擦傷下體，於牆邊遺留血漬。但礙於寶寶經已成年，擔心現時才閹割，會令寶寶「無命」。
雖然義工建議開放豬欄，讓寶寶可自由在家走動，但因家中平日只有婆婆和家傭，兩人無力將寶寶帶回豬欄，更怕有野豬會把寶寶拐走，「有時會有野豬走入嚟o架，呢度咁近深圳河，可能會畀野豬帶咗返大陸！」
「把口生喺人度，人哋鍾意講咩咪講咩，邊嬲得咁多呀！」面對虐豬的指控，郭老太未有介懷，但會着家傭減少餵糧分量，以往每餐餵一碗飯及兩碗麵包，之後會減少至只餵兩碗，以及餵食新鮮蕹菜，望能幫助寶寶減肥及清理腸胃。
攝：吳康琦
文：陳詠賢
逢星期四見刊
第一手消息請下載on.cc東網
