香港大學副校長任命風波沒完沒了,連帶港大校委會人選及組成都備受關注,校委會主席梁智鴻同一批校委快將「夠鐘」,料稍後會有新人獲任命頂上,據《香港大學條例》同《香港中文大學條例》規程,由立法會議員互選產生嘅五名港大校董同三名中大校董,其三年任期喺本月中屆滿,內務委員會將喺本月十六日選新校董。

資料顯示,即將任期屆滿嘅五名港大校董,包括建仔鍾樹根、教育界葉建源、地產建造界石禮謙、獨立議員謝偉俊同白鴿黨涂謹申,據聞雖然港大副校風波鬧到滿城風雨,似乎無阻五人再度爭取冧莊。但政治一日都嫌長,加埋教育泛政治化成為新常態,會否喺最後一刻出現突襲?到時先有分曉。

樹根自誇起監察作用

曾畀外界質疑英文水平未必適合任港大校董嘅鍾樹根話,打算做開就繼續做,又自爆曾向校方提出好多意見,認為做到相當大嘅監察作用;謝偉俊都話有興趣做落去,但同時指校董會機制唔靈活,每次開會人多但時間唔長。身為港大校友關注組召集人嘅葉建源透露,泛民已就此有協調,暫未聽聞有人選變動。當問到係咪想為港大副校風波一事發聲,葉坦言校董會影響力唔大,而且一年只開一次會,想冧莊純粹係身為港大校友嘅歸屬感喎。

中大校董會方面,依家三名由議員互選嘅代表為建仔葛珮帆、飲食界議員張宇人同新民主同盟范國威,前兩者都表態有興趣連任,張宇人話自己自○八年任中大校董會成員,出席率都高於另外兩位議員校董,而有份參與中大事務亦覺得好滿足。話雖如此,但據聞三年前同中大校董位置擦身而過嘅人民力量陳志全,有意今年捲土重來參選,到時或又有一番激戰嘞!

第一手消息請下載on.cc東網iPhone/iPad/Android/Windows Phone Apps