美國大學研究發現，有錢女人擇偶，偏向揀至少同自己有番咁上下經濟能力嘅男性，嗱，係「至少」咋；至於有錢男人搵對象，係唔睇錢嘅，佢哋係揀身材苗條嘅。絕望？未夠。嗰啲高學歷嘅男人又點揀？揀女人有腦？唔係噃，佢哋比有錢男人更貪心，唔止揀身材苗條，仲要埋樣靚。百分之九十五高學歷男士認為伴侶樣靚係個Must；中學程度或以下嘅男士就寬容啲，「只有」百分之七十七一定要揀樣靚。

膚淺？係o架，接受現實吧，呢個係美國Chapman University早前訪問咗二萬八千位十八歲至七十五歲嘅異性戀男女，所得出結果。

原來有套理論就咁講嘅，話因為苗條身形同「青春」掛鈎，「青春」對生育繁殖好重要，所以雄性動物本能傳宗接代就會咁揀；至於雌性動物就睇重存活機會同安全感，所以唔同揀法。信不信由你嘞！

第一手消息請下載on.cc東網iPhone/iPad/Android/Windows Phone Apps