政壇：張建宗暫避風頭

根據立法會《內務守則》，負責研究政策事宜嘅小組委員會應該喺一年內完成工作，而同一時間，喺內委會同各事務委員會轄下嘅研究政策事宜小組委員會最多只能有十個。

勞界議員促「盤點清貨」

其中，鐵路事宜小組委員會、醫療保障計劃小組委員會同扶貧小組委員會早喺一二年、即今屆立會第一個立法年度已成立，但因為相關工作未完成，故之前已向內委會申請延長工作期並獲批准，點知到依家有關工作仲未完成，結果又要再延長工作期。而同呢三個小組委員會一樣，要再申請延期嘅仲有監察西九文化區計劃推行情況聯合小組委員會。

由於小組委員會「大塞車」，喺輪候名單上嘅研究標準工時、研究強積金對沖安排，以及有關長者服務計劃未來發展嘅三個小組委員會都開會無期。提出成立標準工時、同強積金對沖兩個小組委員會嘅勞工界議員鄧家彪同郭偉強，都擔心到今屆立會完結仲開唔成會。鄧指秘書處人手長期緊張，好難叫佢哋安排加開小組委員會，更難叫現有嘅小組委員會「讓路」，但佢就提醒張建宗，社會壓力仲存在，當局點都要「盤點清貨」喎。