今年零售市道淡靜，「港產陀飛輪」萬希泉創辦人William沈慧林坦言本地生意額下跌咗兩成，但佢喺逆市中，仍決定豪擲近千萬，同迪士尼合作，推出《星球大戰》（Star Wars）限量版陀飛輪腕錶。佢話：「其實我喺簽約之前都有一絲猶豫，因為喺所有嘢都未做之前，已經要畀七位數嘅牌照費，即係好似簽個明星代言咁。再加埋我哋造錶嘅成本、之後嘅廣告費等等，加埋都差唔多成千萬。」佢更請來音樂人兼設計師雷頌德操刀設計此聯乘腕錶，將喺十二月面世。佢話：「雖然今次投資好大，不過可以藉此將香港品牌提升去國際水平，係物有所值嘅。」

沈慧林計劃喺各地開分店，彌補香港嘅生意跌幅。

另外，William亦都計劃喺世界各地開設分店，藉此彌補香港區嘅生意跌幅。佢話：「品牌依家喺香港、大阪同埋青島有專門店，嚟緊會喺澳門開。另外，新加坡、杜拜、台灣等地都洽商緊。」

第一手消息請下載on.cc東網iPhone/iPad/Android/Windows Phone Apps