城中鏡：為子女撲學校 名媛氹氹轉
尋日沙田馬場舉行保良局盃賽事，一眾保良局董事局成員同城中名人齊齊入場玩，包括副主席蔡李惠莉、總理Amanda李何芷韻等人。已經有五名孫仔孫女嘅蔡太，着住件紅色連身裙現身，身形好弗。問到新抱汪圓圓再度有喜，佢笑住話圓圓已懷孕五個月，而BB係男定女就冇乜所謂。
蔡李惠莉話想辦一間小學。
李文斌（左）將撲學校嘅重任交畀太太Amanda。
顧東華（右）與紹興旅港同鄉會會長車弘健齊入馬場。
蔡李惠莉想辦小學
講到時下小朋友搵學校難，已開辦一間幼稚園嘅蔡太都覺得好慘，佢話見到大女Carmen正為囝囝搵小學，好辛苦，但都冇計，等佢哋知道為人父母有幾辛苦都好。講講吓，蔡太爆料話好想辦一間小學，但係搵地方唔容易，唔係話想做就做到。
要四圍撲學校嘅，仲有仁濟醫院前主席Edmond李文斌同太太Amanda。Amanda話一對孖生仔女明年要升讀小學，由於係一男一女，要撲嘅學校唔同，填表、搵心水學校等工夫都要雙倍計，真係加倍辛苦，加上細仔亦要入幼稚園，佢話淨係幫三個小朋友填表，已經忙到氹氹轉。咁Edmond有冇幫吓手？點知Edmond笑笑口話冇喎，因為佢驚一旦參與其中，兩人會有拗撬，所以索性交晒畀太太搞喎。
同場仲有保良局總理William顧東華，加入保良局第二年嘅William話，保良局嘅服務可以話係「老少咸宜」，無論安老、扶幼都做得好出色，而佢喺最近兩個月都忙於屋邨籌款，希望搵多啲善款，為社會送暖。
