政壇：港鐵返新工 蘇家碧撲火
喺香港工業總會做總裁後，過檔做港鐵公司事務總監嘅Linda蘇家碧，上月中啱啱返新工，櫈都未坐暖，啲炸彈就係咁爆，睇嚟唔係咁順風順水喎。
蘇家碧櫈都未坐暖，就四出為港鐵撲火。 （資料圖片）
老實講，港鐵成日發生故障同甩漏，又有高鐵工程超支大黑洞，Linda未上任，都預咗大把火頭等佢撲滅。點知一返新工，就多咗單攜帶大型樂器嘅爭議，搞到Linda未坐定，就要四出解畫，呢件事睇怕都係佢意料之外。之不過，睇怕港鐵嘅甩漏，沒有最多，只有更多，Linda要拆嘅彈陸續有來，認真悽慘！
