政壇：搞搞政：鬍鬚曾被「辣親」 網誌唔敢講樓
財爺「鬍鬚曾」曾俊華每逢周日，都化身「鍵盤戰士」寫網誌。佢上周日提到樓市有轉向下趨勢時，話「如果有需要，我們會在政策上作出一些調整」，被外界憧憬政府考慮減辣，結果兩日後遭特首CY梁振英高調澄清反駁，明確指「不會減辣」，猶如摑鬍鬚曾一巴掌。鬍鬚曾尋日發表嘅網誌，隻字不提樓市，但就十三次提及中央政府提倡嘅「一帶一路」，唔知係咪畀「辣椒」辣親，唔敢再提？
到咗尋日下午，鬍鬚曾出發前往美國及秘魯前接受訪問，亦未主動提及樓市同辣招，但當被記者問及市場預期樓市會下調兩至三成，政府會唔會調整政策減辣時，佢只係話政府目標係保持樓市平穩發展，唔敢正面回應，即係講咗等於冇講。
網誌13次提及「一帶一路」
可能係「經一事，長一智」，鬍鬚曾避談敏感話題，所以揀咗最政治正確嘅「一帶一路」國策發揮，仲喺網誌講足十三次。佢喺網誌中回顧早前赴中歐匈牙利、波蘭同德國訪問見聞，認為香港非常有條件成為「一帶一路」嘅地區樞紐，所以香港應加強同不同地區樞紐聯繫合作，再利用呢啲地區作為基地，慢慢將香港市場拓展至「一帶一路」沿線地區。
除咗文中隻字不提樓市之外，相關嘅言論仲熟口熟面，似足CY一直強調香港作為超級連繫人嘅講法，唔通鬍鬚曾知衰，暗中向CY示好？
講開又講，其實鬍鬚曾再度離港，係參加於秘魯利馬舉行嘅國際貨幣基金組織同世界銀行年會，期間或有機會同美國聯儲局主席耶倫見面，會唔會喺傾談之中，搵出幾時加息嘅端倪呢？講到尾，佢咪一樣逃唔過樓市問題。
