政壇：金刀梁 馮敬恩 企硬唔辭職

港大副校風波餘波未了，一批港大畢業生於港大舉行集會，譴責校委會無理否決陳文敏嘅副校任命，再次要求投反對票嘅校委同校委會主席下台。

金刀梁尋日出席活動後，再次就副校風波解畫，稱自己處事公平，睇唔到有辭職嘅理由，又唔答邊個成為其繼任人等假設性問題。佢再三強調，每名校委都係港大信託人，以自己理據同原因投票，無受他人壓力同影響。

不過，金刀梁呢番言論，似乎未能說服馮敬恩，事關馮其後出席電台節目時，繼續把矛頭指向金刀梁，稱金刀梁作為校委會發言人，無確保公眾知情權，而且亦有投票支持「等埋首席副校」，批評對方未能公正主持會議，認為對方即使只剩一個月任期都要辭職，形容其辭職有象徵性意義。

馮死撐同學授權

話雖如此，馮敬恩因爆料破壞保密原則，亦令自己一身蟻，佢死撐話自己嘅授權來自同學，只有同學能夠叫佢走，預計校委會最終會用十二張「鐵票」趕佢走。

出席同一場合嘅港大教育學院副教授李輝，表明唔認同馮嘅行為，形容對方仍在求學階段，能力同認知水準難以判斷何謂「公義」，因此應該選擇遵守保密原則。佢隨後援引馮嘅爆料為前提，再指陳文敏嘅論文引用率低，佢本人嘅影響因子係陳嘅二百倍，力撐校委會否決其任命，非不合理決定。港大校友關注組召集人葉建源反批李輝嘅言論令人不安，認為唔應該睇小年輕人，亦不能隨便指摘人無知。

此外，再有政府高官開腔回應副校風波。「鬍鬚曾」曾俊華尋日離港外訪前，話政府一直尊重大學自主，大學有足夠同有效制度去處理相關事情。