政壇：懶理股價插水 馬雲埋首藝術
阿里巴巴股價冧咗超過五成，兼迭創新低，主腦馬雲轉行搞藝術？未至於咁，但佢近嚟真係進身「知名藝術家」喎。
（互聯網圖片）
話說馬雲最近拍住另一位真正藝術名家曾梵志，攜手創作咗幅油畫《桃花源》，仲會喺聽日（四日）在港作慈善拍賣，估價係一百五十萬至二百五十萬港元之間，拍賣所得將撥捐「桃花源生態保護基金會」。外行搞藝術，畫作估價咁高，當然要佢位「幫手」嘅名聲夠照啦！
講起馬雲嘅墨寶，佢喺二○一三年自創《馬體墨寶》作畫，被吐槽為「畫非畫」，曾以二百四十二萬元高價拍出，但當時無A股股災影響囉。
之不過，馬雲旗艦阿里近期股價表現就認真麻麻，股價再創上市低位，市值唔夠12,000億港紙，被對手馬化騰嘅騰訊再拋離。
