政壇：搞搞政：鬍鬚曾下令慳錢 前線隨時爆大鑊
話說財爺「鬍鬚曾」曾俊華舊年喺網誌公布「零一一」慳錢計劃，指示庫務科研究點樣減慢開支增長幅度，最終決定要求各部門每年慳百分之一嘅開支，即係今年部門開支係一百元，下年就係九十九元，再下一年就只得約九十八元。聽落好似好少，但當呢條數增至數十億元，減幅就去到幾千萬元。
據聞呢個減幅對康文署、食環署同社會福利署呢三個前線部門影響最大，都大呻「巧婦難為無米炊」，其中康文署管理好多公園、體育館、博物館，食環署就有好多外判清潔工，有人就質疑，要削減開支，係咪即係少幾個人管體育館、掃街掃垃圾掃少幾次？到時市民有投訴咪仲弊？所以真係唔知如何着手。至於社署，由於多個社福機構聘請社工、社工助理等開支都係僅僅足夠，如果削減開支，社福機構隨時要炒人。
局長「早禱會」訴苦
相信管轄呢三個部門嘅局長，包括民政事務局局長劉江華同勞工及福利局局長張建宗應該好頭痕。聞說佢哋早兩個月前已經趁高官「早禱會」直接向當時係署理特首嘅政務司司長林鄭月娥訴苦，話部門反映有困難，希望鬍鬚曾諗諗。林鄭聽完都話要跟進吓，但當時鬍鬚曾放緊大假，所以就冇下文。
政府消息人士就話聽到唔少同事反映「搞唔掂」，或者有部門因此感到唔高興，但重申政策原則唔係要減開支，而係按優次重新分配資源，等有需要嘅部門投標去做新政策，仲話冇部門認為唔應該落實呢個政策喎。其實前線部門有咁大意見，鬍鬚曾唔應該充耳不聞，應該要諗諗計先得，唔係隨時爆大鑊呀！
