政壇：橫琴來港插旗搶生意
依家香港嘅經濟發展面對內憂外患，對內有反水貨同「鳩嗚」等「趕客」行動，對外就面對新加坡同埋多個內地城市競爭，國際金融同航運中心地位真係 岌岌可危。我哋最近聽到，原來繼深圳前海管理局舊年喺香港設立辦事處後，位於珠海嘅橫琴新發展區，近日亦已「靜靜雞」喺香港設立咗辦事處，並開始運作，今後海內外投資者可以直接喺香港辦手續到當地投資經商，毋須經常親身走去橫琴處理。正所謂「多隻香爐多隻鬼」，又多個地方直接登陸搶客，香港經濟真係勢危，商務及經濟發展局局長Greg蘇錦樑唔係仲喺度發緊夢呀？
港府懶懶閒 Greg蘇恐孭鑊
舊年成立嘅前海香港辦事處，搵咗香港菁英會榮譽主席洪為民做香港事務首席聯絡官，今次橫琴香港辦事處，就搵咗從事工程顧問業務嘅黃敬做首席聯絡官，前日星期四啱啱開始生效。呢位黃敬係乜嘢來頭？之唔係身兼香港管綫專業學會會長、早前喺城市論壇同立法會議員黃碧雲爭論鉛水成因嗰位工程師囉！
黃敬透露，新辦事處共有六名職員，雖然位於中環嘅辦公室依家仲裝修緊，但佢哋已經開始投入服務，歡迎本地或境外投資者直接聯絡佢哋，以「一條龍」方式辦理到橫琴投資或經商嘅手續。佢期望辦公室喺本月內完成裝修，屆時會正式召開記者會介紹其職能運作。
橫琴同前海咁積極來港開設辦事處搶生意，反觀港府方面就懶懶閒，想因應東盟自貿區成立，喺印尼雅加達開番個經濟貿易辦事處，最快都要等明年先至搞得掂，一旦有立法會議員拉布，就又要再遲啲，到時啲生意同專業人才一早畀人搶晒啦！呢隻黑鑊，睇怕阿Greg都孭唔起。
