政壇：周中做「扯旗山」非執董
名廚周中最近又有新動向，雖然家吓市況麻麻，但仲有唔少公司排隊等上市，其中一間係九月遞上市申請嘅「扯旗山有限公司」，呢間公司係做飲食嘅，創辦人兼主席侯傑輝以前做過電影製片，至於周中師傅就出任公司嘅非執行董事。
如果港交所批准扯旗山上市，周中師傅就可以過吓上市公司董事癮。（資料圖片）
侯主席係香港人，九十年代做港產電影製片出身，○九年到上海創業，一共開咗兩間叫「查餐廳」嘅港式茶餐廳，最近喺當地再新開麵館。但扯旗山業績似乎就平平，一三年純利七百幾萬，一四年唔夠六百萬，今年上半年仲蝕七十七萬幾。咁樣上市機會大唔大呢？銀行界人士話，創業板無盈利要求，只要過去兩年現金流各有二千萬，同上市市值超過一億，有噱頭圍到飛就得喎。
