政壇：陳岳鵬鬚根Look扮老成
啱啱升官做政制及內地事務局副局長嘅陳岳鵬（Ronald），尋日首次以副局長身份到立法會出席政制事務委員會會議。年僅三十三歲嘅Ronald被批評太年輕同工作經歷不足，尋日佢明顯刻意打扮，不但着上成套西裝，仲配襯粉紅色領呔，加上甚有個人特色嘅滿臉鬚根，明顯係扮老成啦！
陳岳鵬着晒成套西裝，加上滿臉鬚根扮老成。
往日陳岳鵬明顯企理得多。（資料圖片）
一向有留鬚嘅Ronald自爆，佢曾問過同事剃晒啲鬚好唔好，但同事都話睇慣佢留鬚個樣，所以Ronald最終都係維持原狀。被問到尋日表現值多少分，佢笑言第一次唔會做足一百分，因為要為自己留下改善空間喎！
有份出席會議嘅立法會議員蔣麗芸（Ann）就「投訴」話，Ronald講嘢聲量太細，可能唔識用咪、對唔正。至於Ronald表現值多少分？阿Ann好唔客氣話，如果十粒星滿分，佢會畀五粒星，即僅僅合格。
雖然阿Ann諸多批評，但又體諒話Ronald新官上任，表現難免戰戰兢兢，以後佢多啲到立法會同議員對話，情況必有改善喎！
