政壇：挽港鐵形象 家碧動作多
由工總跳槽港鐵嘅蘇家碧（Linda），月初先離開工總，月中已經喺港鐵返新工，尋日勞工及福利局局長張建宗去港鐵嘅九龍灣車廠，了解學徒訓練計劃，並同啲受訓嘅學徒會面、對談，了解學徒計劃嘅發展，負責公關事務嘅蘇家碧都有現身，陪佢行車廠，融入新環境、新身份真係話都冇咁快。
蘇家碧
Linda今次轉工真係好快手，或者係因為港鐵嘅負面消息太多，搞到佢都只係抖咗個零禮拜，已經要投入新工，而返工冇耐，就着手打造公司形象嘅救亡工作，好似尋日嘅計劃，港鐵既宣傳學徒訓練計劃，又宣傳電機及機械檢測嘅工作，仲請得張建宗出席，真係一利幾便，無論呢個諗頭係咪來自Linda，佢埋咗位，以後嘅動作只係會愈來愈多。
