政壇：黃銳龍購千花 為貴客搞浪漫
有情人鍾意講浪漫，唔少經濟優裕一族更加搵專業禮賓公司幫手度橋、完成浪漫任務，Aspire Lifestyle增值業務部主管黃銳龍（Johnny）同香港區總經理鄭韓菊芳（Cindy）講起呢啲浪漫工作，真係有苦有甜，不過，從中亦睇到港式浪漫原來一啲都唔嘢小。
禮賓公司嘅Johnny（左）同Cindy話，啲客多數喺求婚時搵幫手。
Johnny話，曾有個客喺上海識到個心儀女仔，個客想喺午夜十二點前送一千支玫瑰畀人，但佢哋收Order時係夜晚九點，只得三個鐘，要發散同事去搵未收舖嘅花店刮玫瑰，再集合埋包裝好。最後係點？梗係Mission Accomplished（任務完成）喇。
佢哋提供嘅浪漫服務好多，買演唱會飛同Book枱食飯絕對係小兒科，試過有外國客嘅太太想要某日睇電視見個MV入面女主角嗰對耳環，佢哋就要搵番當日節目表、再搵MV、搵埋歌星經理人、問隻耳環乜牌子邊度買添！又試過馬年嗰陣，有美國客要喺一周內，搵兩隻馬仔放喺屋企花園行吓行吓，嚟招呼Party朋友。真係你諗得到，佢哋就瞓晒身去做呀。
