政壇：搞搞政：譚志源寸議員炒冷飯
喺二○一一年區選出現「一屋七姓十三票」種票事件，當時政制及內地事務局曾作出多項建議，圖堵塞制度漏洞，點知議會阻力好大，搞到要沿用錯漏百出嘅選民登記制度。結果，近月再爆出歷來最多選民登記反對通知書嘅醜事。尋日立法會政制事務委員會召開特別會議，議員又搬出舊建議，搞到政制及內地事務局局長譚志源都忍唔住發晦氣，揶揄呢啲嘢以前都提出過，但得唔到議會同社會支持。
譚志源尋日提出多個建議完善依家嘅制度，包括提前更改資料限期、更改及登記時提供住址證明文件、進行公眾教育、提高反對機制門檻同相關罰則，以及成立住址資料庫防止輸入時出錯等，希望趕及喺明年立法會選舉期前完成。但議員疑慮多多，外號正盲毛嘅公民黨毛孟靜質疑，現行登記制度得個亂字，政府係咪會要求選民更改地址或新登記時提供住址證明文件？
工黨李卓人就即刻柴台，話年滿十八歲嘅青少年多數係中學生或大學生，佢哋無銀行戶口，好難搵到地址證明。又批評政府將核實責任推畀投訴人，屈舉報人士濫用投訴機制，係助長種票、阻人舉報。立法會議員謝偉俊就建議加重罰則，市民更改住址需即時通知人事登記處同提供新住址，否則屬刑事罪行，政府應嚴格執法堵塞選民登記漏洞。啲議員忙住「炒冷飯」，結果唔少建議其實都係幾年前提出過，認真浪費光陰。
