政壇：堵漏燙手芋 星爺卸健波
近年議會內拉布風氣盛行，負責審查同批准政府提交公共開支建議嘅財務委員會主席亦愈來愈難做，建制派本來協調咗搵金融界議員吳亮星（星爺）同飲食界議員張宇人梅花間竹咁任主席兩年，結果，兩人表明新一屆會期都唔做財會主席。星爺尋日講起呢件事時，暗寸張宇人無喺任期內做剪布嘅前期工作，而呢個艱巨嘅燙手山芋勢要交畀嚟緊接棒嘅保險界議員陳健波，認真靠害！
所謂剪布嘅前期工作係《議事規則》三十七（a）嘅規定，內容涉及議員喺審議某項議程時，可毋須預告提交議案，過去泛民議員成日利用呢項規則提議案成功拉布。財會主席如果就呢項規定做撥亂反正，就一定觸動泛民嘅神經，所以呢個問題就拖得就拖。依家立法會復會在即，星爺話自己「既開心，又擔心」，開心嘅係踏入今屆最後一個會期，可以完成要做嘅事；擔心嘅係議會愈來愈政治化，以致民生項目都受到影響。
拒評張宇人杜禍不力
星爺卸任財會主席時，曾經同接任嘅張宇人反映要將《議事規則》三十七（a）撥亂反正，以免泛民議員繼續錯誤使用呢條議事規則。可惜直至上個會期，部分議員仲係不斷喺財會上重複問問題，問星爺係咪張宇人辦事不力，佢話唔評論，但答案呼之欲出喇。
星爺飲恨咁話，喺審議高鐵撥款時已種下濫用三十七（a）嘅禍根，既然張宇人做財會主席時無解決到呢個問題，佢惟有以委員身份，喺新一個會期聯同其他建制派議員盡力配合新主席，減少重複問問題嘅情況；同時寄望陳健波可以喺接掌財會後撥亂反正咁話。不過，除泛民係一大阻力外，嚟緊都有大把有關議事規則嘅條文排緊隊修改，有排都未到三十七（a），換言之，陳健波亦未必可以完成呢個任務。
