其實喺紀律部隊當中有唔少運動健將,七月份代表香港喺世界警察及消防運動會中,奪得室內六人賽冠軍嘅警察排球會係其中嘅佼佼者。日前佢哋同多個紀律部隊舉行一場沙灘排球賽,一句唔該就攞走晒男、女子組冠軍。身兼警察排球會主席嘅警察公共關係科高級警司Catherine關翠貞話,紀律部隊生活日夜顛倒,做運動可調節吓,而沙灘排球只要四人就可以玩,練習起嚟夠晒方便咁話。

黃駿安(左二)藉打排球保持體能,旁為警察排球會成員。

陳嫣婷(左二)笑稱打沙灘排球嘅熱情蓋過怕曬,旁為其懲教署隊友。

關翠貞(左)話沙灘排球四人即可成行,方便練習,旁為吳守基。

以前係排球球員嘅Catherine話紀律部隊搞排球賽就多,沙灘排球就係第一次。因為新一代警察中有唔少90後,佢哋都鍾意玩排球,所以就舉行今次球賽,等大家可以互相交流切磋。

做水警嘅黃駿安亦曾經係排球運動員,佢話做水警唔似其他警察周街行當運動,故要堅持打排球保持體能。咁比賽前喺飲食上有冇乜嘢特別要注意?佢話只係唔好過飽,反而當更時注意嘅仲多,如唔可以飲奶茶同食蛋,否則會嘔到七彩。

熱愛打波 唔怕曬黑

唔少女仔都好怕曬黑,有份參加今次沙灘排球賽嘅懲教署懲教主任陳嫣婷就話好喜歡打波,早已蓋過怕曬呢樣嘢,甚至覺得古銅色嘅皮膚仲靚咁話。

香港排球總會會長吳守基都有到場觀摩賽事,佢指下個月將會搞沙灘排球亞洲邀請賽,因係國際賽事,啲沙要符合國際賽要求,要特別幼細。但佢慨嘆香港可練習嘅場地太少,周末練波有難度。

第一手消息請下載on.cc東網iPhone/iPad/Android/Windows Phone Apps