政壇：明哥想搵夏千福幫籌錢
喺深水埗經營燒臘飯店嘅「明哥」陳灼明，尋日中秋節，獲邀為街頭音樂活動「Play Me, I'm Yours」，喺深水埗街頭即席彈奏一曲。原來明哥小學時學過風琴，對樂理有粗略認識。明哥喺一位港大醫科學生Thomas帶領下合奏一曲「月亮代表我的心」，又派燈籠畀途經街坊應吓節。
陳灼明（右一）喺深水埗派燈籠。
明哥話正計劃緊向政府申請成為一個獲認可嘅慈善組織，又指希望將服務延伸至南亞裔等少數族裔人士，喺元朗開設一間主打素食嘅食肆，專門提供外賣及到會予南亞裔難民。不過佢話香港人捐嘅錢會用嚟幫番香港人，而外國人捐嘅錢就幫番外國人，嚟緊希望搵早前同佢一齊派過月餅畀露宿者嘅美國駐港總領事夏千福幫手，聯絡美國一啲財團，呼籲佢哋支持。
