政壇：盛品儒過大禮有「腥」氣
十月八日喺四季酒店筵開三十圍婚宴嘅亞視前高層盛品儒同蔡一鳳，日前（九月二十五日）依習俗進行過大禮儀式。當日早上，盛品儒同四名兄弟、親戚及攝製隊一行二十幾人，帶同大禮浩浩蕩蕩前往女家位於澳門嘅住所，女家父母同親友亦一早到場打點。
盛品儒同四名兄弟、親戚及攝製隊一行二十幾人帶同大禮去女家。
盛品儒（右二）同蔡一鳳（右一）前面擺放嘅大禮當中包括龍鳳鈪同金豬牌。
儀式簡單而隆重又溫馨，盛品儒除準備咗名貴海味、洋酒、禮餅、椰子、生果同以利是代替三牲等寓意有爺有子、有腥（聲）氣等好意頭禮物外，當大家聽見禮金為七位數字時，全場即時嘩然。其他珍貴禮物，仲包括龍鳳鈪同代表「如珠如寶」嘅金豬牌，仲有一對由盛品儒設計嘅藍寶石結婚戒指。呢兩枚藍寶石係盛家嘅家傳之寶，寶石旁加上鑽石天使翼，代表盛品儒一生一世守護蔡一鳳。
