政壇：倡搞核心基金 陳家強好頭痕

勞工界誓拉布

好似早兩個星期，突然傳出政府打算喺明年嘅施政報告中，提出取消強積金對沖機制，結果即引起社會極大回響，勞工及福利局局長張建宗即刻出面澄清。雖然件事暫時被平息，但聽講財經事務及庫務局下半年會向立法會提交修訂條例草案，建議設立「核心基金」，預料屆時勞工界一定以強積金對沖機制「走數」為由大玩拉布，睇嚟局長陳家強呢次應該幾頭痕。

過往一年，唔少唔關政治事嘅決策局局長，都紛紛被捲入政治漩渦當中，例如教育局局長吳克儉喺佔領期間向學校施壓，叫學校唔准學生參與佔領，而運輸及房屋局局長張炳良就受高鐵超支同機場三跑一事拖累，但偏偏陳家強就可以獨善其身，完全無任何風波。

但財庫局年底將受到考驗，話說政府建議為強積金成立「核心基金」，簡單啲講係希望設立一個管理費低嘅基金畀市民選擇，如基金管理費每年唔可以高過資產嘅百分之零點七五，政府料年底向立法會提交條例草案，期望明年正式推出。

呢啲惠及民生嘅政策照計應該無爭議，但一講起強積金，勞工界就會向政府「追債」，批評特首梁振英未有履行選舉承諾，屆時唔止工聯會同工黨會狙擊政府，政府中人預料其他泛民都會加入戰場。泛民一直批評政府搞咁多嘢，不如推行全民退休保障。一提起全民退保，好肯定泛民激進派將大打拉布戰，最慘就係陳家強，因為呢啲本來屬於張建宗範疇，但屆時要佢負責擋箭，都咪話唔辛苦。