臨近中秋節,支聯會尋日就一行十幾人帶同月餅、燈籠等應節物品,由西區警署遊行到中聯辦請願,希望內地政府可以喺中秋節前夕釋放在囚嘅異見人士,等佢哋都可以同屋企人一家團聚。身兼支聯會主席嘅立法會議員何俊仁(AV仁)都有出席,不過嚟撐場嘅佢就鬧出笑話,連國家主席都講錯咗,將現任國家主席習近平,講成前主席江澤民,真係(火羅)爆。

何俊仁尋日誤將國家主席習近平講成「江澤民」。

話說AV仁尋日同一班示威者喺中聯辦外叫口號,之後佢又提到最近國家主席到美國訪問,不過佢就好順口咁講咗「江澤民」。不過今次佢又傻唔晒喎,知道自己講錯咗之後,就即刻補鑊糾正番係習近平至啱。其實,AV仁唔係第一次講錯嘢慶喇,早排佢喺立法會先試過拋錯咗書包,將陪同江澤民訪問日本嘅外交部部長唐家璇講成係另一外交部部長吳學謙。今次就仲誇張,連國家主席都搞錯,仲要係搞錯上兩任嘅主席,真係好離譜囉。

不過話說回來,好多民運人士都係喺江澤民時代被捕嘅,AV仁究竟真係壞腦記錯咗,定係特登講錯,真係佢先知喇。

第一手消息請下載on.cc東網iPhone/iPad/Android/Windows Phone Apps