政壇：白鴿黨濫捉種票又甩轆
今明兩年都有大型選舉，令今年嘅選民登記零舍多糾紛，當中民主黨（白鴿黨）同公民黨都指摘唔少個案懷疑種票，結果證實係佢哋嘅錯，仲因而滋擾咗唔少選民。尋日，選舉處公布經核實嘅正式選民登記冊，民主黨（白鴿黨）總幹事林卓廷聲稱再發現唔少可疑個案，仲安排記者會公布添，點知臨見記者前，佢又忽然縮沙，要匆匆取消個記者會，睇佢嘅樣，恐怕一度以為手頭嘅垃圾係炸彈都似，今次抽水都甩轆，真係瘀皮。
泛民黨派早前紛紛去選舉事務處投訴，指今年嘅臨時登記冊出現大量懷疑種票個案，但經過法庭審理，最後證實絕大部分個案都不涉種票，建制派亦斥責泛民政黨呢種做法太擾民。當日白鴿黨已經夠晒醜，點知佢哋都死心不息，繼續摷選民登記冊爆料。
認誤會睇錯登記冊
尋日中午時分，佢哋再通知各大傳媒，話研究過剛公布嘅正式選民登記冊後，發現喺北區區議會石湖墟選區，有一批已被裁定住址有問題嘅選民，再以一拆二、一拆三嘅方式，轉往區內其他住址登記，懷疑有人進行集團式種票，並相約記者下午四時喺立法會舉行記者會公布詳情。
但當傳媒到達記者會會場後，卻發現有人匆匆將貼喺牆上嘅記者會背景大字逐隻撕走，跟住就見林卓廷現身，佢自認睇錯咗臨時及正式選民登記冊嘅資料，有誤會喎，經再三核對後先發現「本來無一物」，故決定取消成個記者會，佢雖然向白走一趟嘅傳媒致歉，但堂堂政黨爆料，好似玩泥沙咁，甩漏咁多，真係冇眼睇。
