城中鏡：徐英偉氹囝囝 熄燈賀中秋
臨近中秋佳節，民政事務局都特別多活動，該局政治助理徐英偉嗰幾日自然特別多嘢做，所以佢就提早一個星期同兩個囝囝慶祝中秋節，全家人喺屋企熄晒燈玩螢光棒，仲將多張照片上載至社交網站同大家分享添！
徐英偉抱住兩歲細仔玩螢光棒，好溫馨。（互聯網圖片）
徐英偉同我哋講，佢將相片上載後先諗起，擔心環境局啲同事睇到後鬧佢玩螢光棒唔環保。不過，佢認為玩螢光棒總好過玩蠟燭咁危險，又聲言啲螢光棒冇晒光之後都唔會即刻丟棄，會留番嚟畀兩個囝囝砌圓圈，扮去荔園玩拋圈攤位遊戲喎。
