城中鏡：鍾國斌做時裝 唔怕市況差
話說立法會紡織及製衣界議員Felix鍾國斌近日去咗英國睇London Fashion Scout，又順道參觀咗電影哈利波特點樣製作。佢大讚該電影中有好多新意念同特別嘅戲服，但不忘指出香港電視業同時裝界都有好多人才，仲有好大發展潛力。
鍾國斌去咗英國睇時裝展同電影哈利波特點製作。（互聯網圖片）
講開時裝，有份搞九龍版元創方（PMQ）嘅Felix話，雖然近日香港市道轉差，但係九龍PMQ仲預期喺年底開業。佢解釋，有啲生意人對產品有信心，反而會睇準個市唔好，揀定租平、地段又好嘅舖位。至於外面平租會否影響九龍PMQ嘅反應呢？佢就話如果個市真係太差，佢哋嘅租金可再減幾個百分點，反正本身平租，基數唔大，唔會有大影響喎。
對港島PMQ早前被揭勁蝕千六萬，Felix指九龍PMQ規模較細，只有約一萬呎，加上位處深水埗區，租金會再平啲，預計頭一年會蝕錢，但唔會好似港島PMQ蝕咁多，又話就算有設計師已排緊隊租港島PMQ，都歡迎嚟排九龍版。
