政壇：領展新Logo 源自「媽媽牆」
領展早排換新名兼換新Logo，設計新Logo位設計師Tom Munckton，出自英國著名廣告設計公司Mother London。呢間公司其中一樣出名之處，就係啲設計師每朝返工都見阿媽。
Mother London呢幅「媽媽牆」，就係提大家做足以讓阿媽驕傲嘅嘢。（互聯網圖片）
帶埋阿媽返工？冇錯，事關公司就係有幅牆，掛滿晒員工媽媽嘅相，意思係要每位員工記得，自己係做緊啲足以讓媽媽驕傲同自豪嘅嘢。
Mother London仲有樣特別，就係全公司二百幾人都喺同一張長枱排排坐。張枱好似馬場咁環繞成層辦公室，足足有二百五十呎長，仲好似斜路咁「行上」上一層，分分鐘係全世界最大嘅辦公枱，場面都咪話唔壯觀。佢哋仲有一個規矩，就係員工每兩個月調一次位，等大家可以識得晒大家兼互相激發靈感。
