政壇：立會秘書處捱到殘
自○六年起，政府分階段實行五天工作周，依家政府同唔少公營機構都已經實施咗，但立法會秘書處至今都仲未實施五天工作，原來呢個都係歷史遺留落嚟嘅問題，因為議員就提出議案或修正案作出預告時，一直都視星期六為工作天計算在內，所以如果要改唔計周六，就要改埋議事規則，可以話係牽一髮動全身。加上立法會依家星期六都成日有會開，秘書處人員亦難免要返工，所以話立法會想落實五天工作真係遙遙無期。
周六開會多逼當值
雖然唔少公營機構都已經行緊五天工作，但立法會秘書處至今都唔能夠受惠，據悉，按立法會現時嘅議事規則，議員如果要喺立法會或者立法會嘅事務委員會提交議案，又或就一啲議案提出修正案，都要喺有關會議同審議議案前嘅特定工作天作出預告，由於過往星期六都當係工作天，所以星期六都會被計在內。如果星期六唔再係工作天，條數又要重新計過，分分鐘仲麻煩。
除咗涉及提交議案，依家立法會唔少事務委員會嘅會議都會喺星期六開會，好似之前立法會政制事務委員會就政改舉行公聽會，因為想表達意見嘅團體代表同市民眾多，結果唔止星期六要開會，仲要開到夜晚添，而秘書處唔同部門嘅職員自然亦避無可避要返工。
另外因議員每一個年度加入各事務委員會嘅截止日期，都係首次大會嘅前一個星期六，而今年就係下月十日星期六嘅中午十二時。秘書處已預料傳媒同議員都會好關心各委員會「入會」情況，所以已經預咗人手喺當日處理同公布。咁搞法，真係辛苦晒立會秘書長陳維安同佢班同事嘞！
