城中鏡：健腦靠悅讀
人口老化問題愈來愈嚴重，為加深市民對腦退化症的認識，由香港中文大學協助管理嘅賽馬會耆智園，日前舉行十五周年慶典兼「腦動全城閉幕禮」。多年前證實患上腦退化症、有「光纖之父」之稱嘅諾貝爾得獎人高錕都有出席，仲全程拖實太太高黃美芸，馬會大董梁高美懿同中文大學副校長霍泰輝等則大談補腦大法。
高錕（左）活動中全程拖實太太高黃美芸。
梁高美懿（左）同霍泰輝各有補腦妙法。
陳章明平日靠同家人打麻將補腦。
有份出席活動嘅立法會議員鄧家彪話，每晚臨瞓前都會遠離電子產品，以免影響睡眠質素，平時又好鍾意食蜜糖焗核桃，聽聞有助補腦喎。咁究竟食核桃係咪真係可以補腦？本身係醫生嘅霍泰輝坦言，核桃補腦無乜根據，有人認為食核桃同豬腦可以補腦，只係因其外觀似腦，覺得可以形補形，但人腦點都聰明過豬腦，食完豬腦咪蠢咗？所以佢話保持健康作息、營養均衡先最實際，而佢又不時睇小說，藉幻想小說描述嘅畫面鍛煉腦部。
陳章明打牌練腦
安老事務委員會主席陳章明都係愛閱讀之人，除咗鍾意睇科幻小說，又酷愛科幻電影。佢話平日鍾意會同家人打麻將，因為成日見面無咁多偈傾，所以打吓麻雀就最啱嘞。至於梁高美懿就有另一護腦妙法，就係每晚好似溫書咁重溫一日發生嘅事，諗吓見過咩嘢人，唔記得就即刻睇番，當運動吓個腦之餘，仲可以令翌日工作更有效率，一舉兩得。
