政壇：搞搞政：泛民舉白旗為時已晚
泛民主派上個立法年度突襲工務同人事編制兩個小組委員會，順利取得主導權，搞到建制派大為不滿，揚言今年要報復，搶攻各事務委員會，誓要泛民一個主席位都攞唔到。點知泛民飯盒會尋日開完後，召集人何秀蘭就開聲要求建制尊重傳統，按議會比例分配正副主席位置喎。泛民好似患上失憶症咁，唔記得當日自己撕毀協商機制嘅前事，俗語話，先撩者賤，打死無怨，依家泛民舉白旗都嫌遲喇，更何況發惡冇人驚？
何秀蘭話，泛民一定唔會接受建制派欽點，安排咩人可以做，咩人唔可以，除非可以互點，由泛民指定建制派主席或副主席人選。佢又話，希望件事重回正軌，佢話一二年以前建制同泛民兩大陣營都係按比例分配正副主席，依家個比例係泛民佔百分之三十九左右，咁泛民都應該獲分百分之三十九嘅事務委員會主席位，希望建制尊重傳統。舊年泛民搶位時，又唔見佢哋記得呢個機制？依家人哋以牙還牙，佢哋講乜都冇用喇。
另外，泛民議員亦都宣布成立民主派聯絡小組，希望同中央溝通表達一個正面態度。小組召集人郭榮鏗就希望泛民可以同中央有正常化、透明化及專業化嘅溝通，但小組只係知會角色，唔會就中央同個別黨派嘅溝通作出決定或表決，亦唔會綑綁立場。政改方案已被泛民否決，之前唔肯溝通，依家見到民主黨同中央溝通，又唔抵得話要溝通，都唔知做緊乜，都好，新民主同盟范國威就拒絕參與呢個聯絡小組喇。
