政壇：防賄例規管特首 拖三年無下文
東方報業集團早喺二○一二年揭發「貪曾」前特首曾蔭權爵士在任期間嘅貪腐醜聞，引起各界嘩然，多個團體亦先後到廉政公署舉報要求立案調查，但案件調查至今超過三年，貪曾仲未「落鑊」。當年負責檢討規管特首收受利益制度嘅獨立檢討委員會，曾經建議將特首納入《防止賄賂條例》規管，由新成立嘅法定獨立委員會全權決定特首可否收受利益。不過，三年過去，仲未見《防止賄賂條例》有立法或修例的迹象，莫非特首嘅權力已經「超然」於相關法例，擁有「免死金牌」？
貪曾「貪盡海陸空、歎盡省港澳」嘅貪腐醜聞喺一二年曝光，當中最廣為人知嘅係貪曾夫婦偕同多名本地富豪，喺三艘價值四億元嘅超級遊艇度過三日兩夜澳門豪華之旅；其後貪曾再被踢爆廉租深圳「禮賓府」，被質疑涉及利益輸送或延後利益。廉署其後立案調查，但三年過去仲未有下文，而前刑事檢控專員薛偉成同現任刑事檢控專員楊家雄，被問到幾時先會就有關案件作出檢控決定時，都只係回答「very soon」，令人擔心案件最終「石沉大海」。
延誤立法難彰廉潔
其實除咗貪曾案，將特首納入《防止賄賂條例》嘅建議同樣係拖足三年無下文。防止及處理潛在利益衝突獨立檢討委員會一二年時曾建議立法，將《防止賄賂條例》第三條同第八條適用範圍涵蓋至特首，規定特首收受利益前要得到法定獨立委員會許可。當時仲係候任行政長官嘅梁振英，曾經承諾上任後會盡快同嚴格落實建議，但三年過去，都仲未有聲氣，唔知是否與他涉嫌收受澳洲上市公司UGL五千萬元有關呢？
事緣梁振英喺一一年十一月二十七日宣布參選特首，但卻喺同年十二月二日同UGL簽合約，承諾支持該公司喺亞洲擴展生意業務，並獲四百萬英鎊（約五千萬港元）作回報，事件曝光後遭受社會各界質疑。不過，即使《防止賄賂條例》真係落實立法，亦無法追溯立法前嘅案件，照計如果今屆政府立法，最多都係規管下一屆特首，所以除非現任特首要考慮甚麼特別原因，或係有意競逐連任，否則無法解釋為何唔敢立法。
事實上，立法可避免再出現類似貪曾咁嘅貪腐醜聞，還廣大市民一個廉潔香港，因此睇唔到政府點解畏首畏尾，不斷拖延立法。
