城中鏡：美女教煮
香港台灣婦女協會早前舉行周年大會同午宴，協會會長Judy林華琴特登邀請居港五年嘅台灣美女廚神Jennifer分享煮嘢心得。
林華琴（左）請Jennifer（中）分享香港嘅隱世醬料心得，右為香港台灣婦女協會副會長歐陽珍。
蔣馬榮華（中）同埋協會副會長王瑩如（左）以及好友陳美喜喺午宴上齊歡聚。
陳趙滿菊（前左）、遠東貿易中心主任陳愛蘭（前右）及台灣同鄉會顧問會長賴李承美好啱傾。
Jennifer笑笑口話，初時佢經常由台灣搬嘢返港煮台灣菜，行李篋裝滿鼓油等調味料，後來的起心肝學煮香港菜，發現醬料好重要，仲因此發現唔少隱世美味醬料。當日佢仲同姊妹逐一分享，聽得大家津津有味，仲叫Jennifer快將食譜譯成英文，方便畀家傭照辦煮碗喎。
萬計粉絲網上追隨
Judy話一直都想搵多啲旅港台灣年輕人加入協會，為協會注入新血，早前喺社交網站發現經常發表煮餸嘅心得、有數以萬計粉絲追隨嘅Jennifer。後來知道Jennifer係台灣人，Judy立即眼前一亮。原本喺私募基金工作嘅Jennifer笑稱，初時諗住嚟香港賺大錢，結果就嫁畀印度籍丈夫，從此變成家庭主婦，於是開始去學煮餸，並擺上網分享，仲出版咗本暢銷食譜添！
當日工業家蔣震太太馬榮華都喺度，佢笑稱嚟港幾十年，依家都仲會帶台灣鼓油等調味料返港，因為始終喜歡家鄉味道。
同蔣震女兒蔣麗萍一齊發起成立關注內地留守兒童「愛基金」嘅保良局前主席陳亨利太太陳趙滿菊亦有到場，佢話今個暑假，愛基金資助內地五百多個機構開暑假班，共有五萬名孩童受惠，冀喚起社會關注，齊為內地留守兒童送暖。
