政壇：搞搞政：拒當芬姐副手 廖長江謀奪位

根據建制派當年嘅協定，司法委員會主席呢個位，頭兩年由身兼大律師嘅梁美芬擔任，之後兩年就由本身都係大律師嘅中總代表廖長江接任。不過，去到第三年開始前，據聞有人提出因佔領行動與政改方案表決臨近，適宜搵一個有經驗嘅人擔任呢個位置，結果梁美芬再度連任。

梁美芬唔堅持冧莊

早前建制派討論第四年嘅委員會正副主席分配時，有人又要求讓梁美芬再坐一年，即立法會四年任期都由佢做主席，並建議廖長江改任副主席。據聞廖長江得悉事件後，頗為氣憤，聲言「寧願乜都冇得做」，都一定唔會做「阿芬姐」嘅副手！近日佢更四出向其他建制派拉票。據聞唔少建制派都支持維持原來協定，由廖長江接掌司法委員會。形勢比人強，梁美芬尋日就喺電台話，如果廖長江想做主席，佢都唔會堅持喎。

至於房屋事務委員會主席之爭，據聞工聯會內部認為，麥美娟做主席已經上手，加上建仔嘅鍾樹根已擔任監察西九文化區小組委員會主席，無理由一人霸兩個位，好應該讓麥美娟連任主席。不過，工聯會亦打定輸數，因為該會議員不足以抗衡人多勢眾嘅建仔，但亦想將事件公開，畀公眾評論。