政壇：至叻星：發展大嶼山 波波有諗頭

政府一直銳意發展大嶼山，希望塑造大嶼山為多采多姿嘅旅遊同康樂勝地，大嶼山發展諮詢委員會經濟及社會發展小組日前就此開會，商討發展策略；發展局嘅規劃大綱建議大嶼山發展多元化主題，包括「刺激」、「奢華與享受」、「生態」、「文化歷史」、「探險」同「放鬆與養生」等六個主題同十一個主要樞紐區，以吸引更多遊客。發展局局長「波波」陳茂波睇落想喺大嶼山發展上大展拳腳，但發展計劃咁多年嚟都齋講唔做，成日開空頭支票，難免畀人覺得今次又係紙上談兵。波波真係要有實際行動，如果唔係，香港嘅旅遊同經濟發展仍然係一潭死水。