政壇：鄧家彪陪女 變相幫建仔
話說工聯會嘅立法會議員鄧家彪囡囡鄧澄，學咗大戲已有一年幾，經常周圍去表演。好似下周六喺大埔又有表演，鄧澄將喺耀鳴聲劇團表演一段十幾分鐘嘅折子戲，扮演紫釵記入面嘅霍小玉。正所謂賣花讚花香，鄧家彪都大讚個女造型超得意喎。
鄧家彪（左）讚囡囡扮相好得意。 （受訪者提供）
鄧家彪話個女一星期練習兩次，佢平日唔得閒陪個女練，都要麻煩太太幫手。所以若囡囡有表演，佢都盡量抽時間去支持。咁啱囡囡所屬嘅劇團成日喺大埔演出，所以鄧家彪呢年半已奔走大埔區多個社區會堂，熟晒地頭。
但工聯會喺呢區完全冇區議員，而呢啲活動多數係建仔搞嘅，有時建仔區議員見佢早到，仲會叫佢幫手做主禮嘉賓添！作為一個工聯會嘅議員，反而成日幫建仔主禮，真係蝕底又尷尬喇！
