政壇：委會爭奪戰 玩殘秘書處
依家距離立法會復會仲有幾個星期，但泛民主派同建制派一早已經就各委員會嘅正副主席爆發爭奪戰。牽涉喺呢場爭奪戰之中嘅，除咗泛民同建制兩個陣營，仲有立法會秘書處。嘩！咁搞法，秘書長陳維安咁咪好頭痕？
每年新會期開始前夕，泛民都會同建制開會協調來年各個事務委員會嘅正副主席安排，但上個會期，泛民以突襲方式取得人事編制及工務兩個小組委員會嘅控制權，令到建制派憤憤不平，計劃今個會期包攬各大委員會正副主席之位。另一方面，建制派之間亦未協調好，因此內會、房屋及司法事務委員會先後爆出內訌爭位嘅情況。
容易jam紙礙傳真
由於今個會期競爭好激烈，令報名情況更加複雜，據聞秘書處為此相當頭痛。因為現時仍然有唔少議員係透過傳真（Fax）報名加入委員會，但傳真有可能會發生技術故障，例如係議員本來喺限期前傳真畀秘書處，但傳真機可能正大量處理傳來嘅文件，或者jam紙，所以根本傳真唔到。一旦過咗截止日期，議員就無法加入相關委員會。聽講秘書處不時為咗呢啲問題而同議員有拗撬，搞到秘書處頭都大。
繼續係咁嘅話，唔係辦法喎，陳維安應該諗吓計喇！當然有諗喇，為咗解決呢個問題，據聞秘書處考慮緊好唔好停用傳真機，亦有人提議改用電郵報名。不過，用電郵就會衍生出保安問題，反而用傳真機方便確認身份；另一個考慮，係唔知以議員發出電郵嘅時間為準，抑或係以秘書處收到電郵嘅時間為準，分分鐘令個程序變得更複雜。睇嚟泛民同建制嘅爭奪戰，最快玩殘嘅應該係秘書處。
