城中鏡：作育英才
香港大學一直獲得唔少社會名人捐助，尋日港大就向六位對港大同社會有貢獻嘅傑出人士頒授名譽大學院士名銜，太子珠寶鐘錶主席鄧鉅明就係其中一位。雖然港大近期因為副校長委任一事而鬧出連串風波，而港大亦喺世界大學排名榜中下跌，但鄧鉅明就大派定心丸，話唔會影響佢對港大嘅捐助喎。而對於港大排名下跌，校長馬斐森就死撐係因為評分方法變咗，乜真係咁簡單咩？
鄧鉅明（左）獲頒名譽大學院士銜，業界好友「鐘錶大王」孫秉樞到場支持。
李國棟同樣獲港大頒授名譽大學院士名銜。
梁智鴻（左）同馬斐森都被近期港大副校長任命及校委會風波搞到頭都大埋。
港大向鄧鉅明、香港醫學專科學院主席李國棟同資深大律師陳景生等共六人頒授名譽大學院士名銜。對於近日港大發生秘密捐款、副校長任命等連串風波，鄧鉅明就話政治嘅嘢好難搞，而且仲絕對會影響港大喺世界院校中嘅排名。不過，佢明白大家一定會有唔同意見，就算百分之九十九嘅聲音一樣，百分之一嘅人有唔同聲音，都係要諗辦法處理，但佢唔會因為百分之一人嘅行為，而影響佢喺教育上嘅貢獻。
馬斐森推諉評分方法
國際高等教育及人力資源研究機構日前公布咗今年世界大學排名榜，港大就連跌兩位至第三十位，被香港科技大學超前。馬斐森就話係同評分機構評分方法有關，但都會認真看待有關機構嘅結論，同埋作出相應行動，但係佢就強調制訂大學政策，並唔係建基於排名變動嘅。
港大校務委員會主席「金刀梁」梁智鴻都有出席頒授典禮，對於近日有指校委會將會調查有委員洩漏會議內容嘅事件，佢話任何機構討論重要議程時都需要保密，至於係唔咪要徹查，佢就話校委會做嘅嘢係保密喎。
