政壇：搞搞政：建制派封殺富貴黨 張宇人隨時玩出火
日前表明有意角逐立法會內務委員會主席一職嘅議員張宇人，唔單止挑戰現時擔任主席嘅工業界議員梁君彥，又批評建制派唔應該霸住各委員會正副主席位，甚至表明會游說新民黨、泛民主派政黨同獨立議員支持，更指泛民中已有人表明會支持佢，再加上佢所屬嘅富貴黨力撐，擺明同建制派對着幹，令建制派不少人都大感不滿。
星爺拒主持財委會
據悉，建制派中人對張宇人添煩添亂、自己人打自己人感到不滿，諗過度過之後就決定，如果張宇人執意爭做內委會主席，佢哋對呢場「內戰」亦決不相讓，皆因建制派如果團結、乖乖地投票，就算泛民同個別獨立議員支持張宇人，張宇人亦唔會夠票當選，但如果張宇人真係夠票當選，富貴黨通敵就證據確鑿，建制派就可以名正言順將該黨踢出家門，實行全面封殺，以後建制派開會都唔使理會富貴黨，到時張宇人以至富貴黨就真係玩出火喇，真係唔知點收科？
另外，張宇人無意再做財委會主席，而之前任財委會主席、主持新界東北發展計劃撥款申請會議而搞到一鑊泡嘅金融界議員「星爺」吳亮星，尋日話唔會按原本協調出任新一年度嘅財委會主席。星爺解釋係因為「拉布」情況嚴重，覺得難以有效主持會議。不過，就算張宇人同星爺唔做財委會主席，建制派都唔使愁，因為已經協調由現時財委會副主席、保險界議員陳健波接任。至於泛民會派邊個出選財委會同內委會主席，就要再作討論。
