政壇：親情化為力量 顏太絕處逢生
近日接連發生多宗倫常悲劇，令人嘆息。原來人稱「帽后」嘅飛達帽業副主席顏寶鈴（顏太）都係「過來人」，佢仲好坦白咁講「曾經諗過死」，不過之後畀佢諗通咗，仲對人生有新體驗添！
諗到老公顏禧強（左）同兩個仔，顏寶鈴結果肯放過自己。（資料圖片）
顏太話公司上市初期業績唔錯；到○七年全年賺4,170萬，但佢已經覺得同○六年比，少咗成52%，已經唔多開心；點知，○八同○九年更加要蝕錢，分別蝕2,925萬同4,513萬，更加覺得自己好唔掂。蝕幾千萬，顏太真係好在意，仲話「真係有諗過跳樓」。
好在，佢當時有畀空間自己，佢諗深一層，自己死咗邊個接手公司？總唔可以留低「蘇州屎」畀老公顏禧強，要老公接手做，即係玩佢。仲有，邊個照顧兩個寶貝仔呢？嗰一刻feel到自己對老公同兩個仔好重要。結果，顏太繼續咬住牙關咁過，佢就係咁，唔肯輸畀自己，到一○年轉虧為盈，賺番567萬添！
顏太仲認，以前好怕畀人知自己失敗；但佢依家諗通咗：失敗，唔怕講人知，唔怕同人分享；佢依家仲明白到：走咗，係解決唔到問題嘅。
