傅振中（右）進行的民調與醫管局呼籲市民提防嘅電騙內容相似。
呢排電話騙案猖獗，搞到人心惶惶，市民都對來歷不明嘅來電提高警覺。醫院管理局前日發表聲明，指當局接獲市民查詢，有人以匿名電話收集有關器官捐贈嘅數據，提醒市民小心受騙，並將個案轉交警方跟進。正當各方追查呢個來歷不明嘅電話調查之際，保衛香港運動尋日就發表「一分鐘器官捐贈民調」，莫非該組織就係今次電騙民調嘅幕後黑手？
保衛香港運動原定尋日發表「一分鐘港大副校民調」，但臨時竟然改為「一分鐘器官捐贈民調」，而有關器官捐贈民調係喺九月七日至十四日進行，難免令人聯想到，佢哋因為醫管局嘅聲明，而將民調提早曝光。不過，發言人傅振中否認，認為同一時間，亦可能有其他人做同一民調，所以醫管局要求市民提防，唔一定係該組織，但承認做民調嘅方法有可能會引人誤會。
至於臨時換題目，傅振中話係因為做「副校長民調」時，「甩轆」將陳文敏嘅職位由港大法律學院前院長，寫錯做港大法律學院副院長，為免影響民調嘅準確性，先至決定改為發表一分鐘器官捐贈民調。
第一手消息請下載on.cc東網
