政壇：陪女友上庭 岑敖暉煲煙提神
話說東區法院尋日審理多名反新界東北撥款示威者，喺舊年六月衝入立法會大樓抗議嘅案件，其中一名被告為土地正義聯盟召集人何潔泓，亦即「佔領男神」學聯前副秘書長岑敖暉嘅女友。岑敖暉亦有到場，但未知係為咗聲援各被告，抑或純粹陪伴女友，而岑敖暉可能唔慣太早起床，睇嚟好似未瞓醒咁。
岑敖暉（右）喺庭外準備煲煙之際，一發現有記者，隨即警覺地快手收起香煙同火機。
當聲援人士示威結束後，何潔泓等各人陸續步入法庭受審，岑敖暉立即攞出一根香煙放喺唇邊，準備喺法院門外點火煲煙，提一提神。不過，當發現有記者在場拍攝，一向重視個人形象嘅岑敖暉，隨即警覺地快手收起煙仔同火機，然後若無其事地同坐喺法院門口石級上食早餐嘅社民連副主席黃浩銘扮傾偈。身兼公眾人物同「跟得男友」兩重身份，真係唔易做呀！
