劉業強（中）上場無耐，即被鄉紳「考牌」。
有「新界王」之稱嘅立法會議員劉皇發，由八十年代開始就出任新界鄉議局主席，直至今年先退下火線，佢大仔劉業強就喺無競爭嘅情況下，自動當選為主席。發叔在位期間，喺鄉議局算得上係壓得住場，但自從佢退下來，部分鄉頭又開始按捺不住，喺尋日嘅鄉議局執委會會議上，催迫劉業強為新界居民發聲，處理丁屋同僭建等棘手問題。記者仲發現，一直屹立喺鄉議局大樓的發叔銅像起晒銅綠都無人理，果然係人走茶涼。
劉皇發銅像起晒銅綠，似足老人斑。
屏山鄉事委員會主席曾樹和尋日突然喺會議途中，向劉業強「考牌」，質問對方點樣幫新界居民同政府周旋，處理僭建、土地等問題。佢愈講愈激動，仲提議必要時組織五千人搞抗爭行動，「為新界人創造奇迹，拎番自己嘅嘢」。其後，錦田鄉委會主席鄧賀年、十八鄉鄉委會主席梁福元都加入戰團，後者話鄉議局副主席張學明身兼行政會議成員，理應幫手同政府嗰邊傾吓。劉業強會後坦言，政府現時確係少咗諮詢鄉事派喎。
除咗搞抗爭，上水鄉事委員會主席侯志強亦因應臨近中秋節，建議用公數為二十七鄉每鄉買一百盒雙黃白蓮蓉月餅，另買一百盒供委員同職員享用，後來仲話買夠三千盒添！若以二百元一盒計算，共花六十萬元，難怪鄉議局入不敷支喇！
第一手消息請下載on.cc東網
