政壇：「奶媽」難救吳得掂
兩個月前爆發嘅鉛水風波停不了，更由公共屋邨蔓延至學校，教育局局長「吳得掂」吳克儉早前竟拒為學校全面驗水，被各界炮轟，雖然最後有人稱「奶媽」嘅上司幫手補鑊，承諾先為幼稚園驗水，但吳得掂並無因此而甩難。港大民意研究計劃尋日公布有關特首及問責司局長嘅最新民意調查，結果顯示吳得掂嘅支持度下跌九個百分點，民望負值三十六個百分點，係十二名局長之中最低分。而律政司司長袁國強評分亦下跌，跌零點八分至四十六點六分。
大學排名跌仍死撐
民研計劃喺九月七日至十日期間，透過隨機抽樣方式，成功以電話訪問一千零十一名市民。調查結果顯示，對比一個月前嘅調查，十二名問責局長中，有五名局長支持率淨值下跌。新官上任嘅公務員事務局局長張雲正同民政事務局局長劉江華嘅支持度都麻麻地，雖然張雲正嘅支持率淨值有十五個百分點，但認知率只有二十九個百分點，被評為表現不彰；至於劉江華嘅支持率為百分之二十二，較上月嘅調查下跌兩個百分點，被指係表現一般。劉江華、發展局局長「波波」陳茂波同吳得掂嘅民望都出現負值，分別為負值二十二、三十三同三十六個百分點；吳得掂同波波都屬於「表現失敗」。
吳得掂唔單止個人表現失敗，喺佢管理之下，香港各大專院校喺QS世界大學排名都「唔係好掂」，好似香港大學就下跌兩位至三十位。吳得掂尋日回應時，竟然話環球喺大學排名上有好多研究，而研究有唔同標準，頭七十五間大學中，有四間係香港嘅大學，表示香港喺學術地位上相當好。現時大學學術成就已經響起警號，佢都依然闊佬懶理，到四間大學都跌出頭七十五名時，佢就真係「唔得掂」喇！
