城中鏡：邱子傑囡囡 小廚神奪季
小朋友變大廚？唔係講笑o架，事關啲星級大廚評判都話，估唔到小朋友都可以煮到大廚嘅水準出嚟呀！
囡囡Jessie奪得小廚神季軍，邱子傑即上載捧盃相。（互聯網圖片）
邱子傑與妻邱李茂琪常同仔女外遊。（資料圖片）
溥儀眼鏡老闆邱子傑嘅囡囡Jessie邱聖華日前啱啱過十三歲生日，兼且為自己帶嚟一份最好嘅生日禮物，就係喺無綫節目《我係小廚神2》中攞到季軍。Jessie喺呢個比賽中同幾位年紀相若嘅小朋友比併廚藝，Jessie嘅水準唔錯，表現淡定，喺烹調菜式過程中經常展現燦爛嘅笑容，每當評判對佢嘅菜式提問時，佢回答時總會帶點羞澀，對批評亦虛心接受，而喺廚藝不斷改進下，仲成為大熱，經過幾輪嘅淘汰賽後，最後打入三甲奪得季軍。身為爸爸嘅邱子傑當然好高興，喺網上上載咗囡囡攞住獎盃嘅相片分享箇中喜悅，仲留言話：「我係小廚神2季軍！Well done Jessie！」
其實，Jessie自細已經好鍾意煮嘢食，三歲已開始入廚、十歲時曾跟名廚學藝嘅佢，自小已經係甜品高手，同時亦好關注健康飲食，舊年仲學埋種植有機蔬菜添！
