城中鏡：傷健旅遊樂
對好多傷殘人士嚟講，旅行可能係一件遙不可及嘅事，國際華商觀光協會日前就募集咗二百名嚟自學界同旅遊界嘅義工，舉辦「旅遊無障礙，傷健同歡樂」活動，帶一百名傷殘人士同家屬同遊迪士尼樂園。活動召集人、康泰旅行社董事總經理Jason黃進達話，希望發掘更多無障礙旅遊路線，方便殘疾人士同長者外遊。原來香港總商會總裁Shirley袁莎妮都對無障礙旅遊有深刻體驗。
黃進達（右）同袁莎妮早前出席香港總商會企業家講座。
胡兆英（左）同廖廣翔支持發展無障礙旅遊。
黃進達帶領一班傷殘人士同遊迪士尼樂園。（受訪者提供圖片）
當日Jason喺園內帶領傷殘人士進行多項任務，包括喺景點前合照、同賣氣球嘅職員合照、收集樂園貼紙等，佢話好多殘疾人士都熱衷旅遊，亦有能力照顧自己，但礙於唔同國家嘅設備同環境問題，難以如願。依家佢正研究無障礙旅遊喺唔同國家嘅可行性，暫時認為日本等地嘅輔助設施唔錯。香港傷健協會主席何永煊就話發展無障礙旅遊，除咗豐富殘疾人士生活外，對長者一樣有幫助。
長者旅遊興致佳
出席嘅仲有旅遊業議會主席胡兆英、旅遊事務助理專員廖廣翔同萬通旅行社總經理Anthea羅詠詩。Anthea透露，早前同媽媽及婆婆去完黃山旅行，八十幾歲嘅婆婆上山行得仲快過佢，可見長者對旅遊興趣不減。而Shirley早幾日喺總商會企業家講座上亦講起同長者旅遊嘅經驗，佢話爸爸因為年紀大要坐輪椅，搭飛機好唔方便，自己顧住父母同時又顧唔到行李，所以早前就諗到一家人齊齊坐郵輪，其中兩日途經日本沖繩，剩餘時間就可以輕輕鬆鬆喺郵輪上玩。
