政壇：搞搞政：肥佬黎貪曾逍遙 袁國強枉談法治
話時話，佔領中環行動（佔中）就快一周年，但眾多被捕嘅參與或組織者至今仲未被檢控，包括喺佔領區坐鎮「扮指揮」嘅壹傳媒集團前主席「肥佬黎」黎智英仲逍遙法外。此外，肥佬黎秘密捐款畀泛民主派人士同組織案件，以及調查超過三年嘅「貪曾」前特首曾蔭權爵士嘅貪腐案，唔單止未有檢控決定，司法同執法官員仲同貪曾同團上京閱兵，令人嘩然。不過，律政司司長袁國強接受訪問時，竟然還夠膽話法治係民主重要基礎，講一套做一套，認真雙重標準！
疑懼外國勢力唔敢告
袁國強近日接受內地傳媒訪問時稱，喺處理非法佔中上可以看到，香港法治依然健全，但佔中對法治帶嚟嘅挑戰依然存在。佢指出，如果只要有唔同嘅政治訴求，就可以隨心所欲去做違法嘅事，咁係非常危險嘅，強調法治係民主非常重要嘅基礎，無論對法治的理解有多少種，但最基本仍要尊重法律，如果對法律或法庭裁決都唔尊重，法治就好難維持。佢又話，如果尊重民主，就應該有包容精神，對抗並非最好嘅方法，如果涉及違法行動，就更加唔應該。
不過，佔中將近一周年，律政司目前只係向一啲佔中「卒子」提出檢控，但最關鍵、最核心嘅佔中發起人戴耀廷、陳健民同朱耀明仲未「落鑊」。而連日喺佔領區「打躉」「扮指揮」嘅肥佬黎、自認「逍遙法外」嘅天主教香港教區前主教陳日君、佔中搞手「李漢奸」白鴿黨創黨主席李柱銘、白鴿黨嘅立法會議員「AV仁」何俊仁等涉案泛民人士，至今同樣未有任何檢控決定，而肥佬黎早前仲去美國「遊湖玩水」樂逍遙。
至於調查超過一年、有證有據嘅肥佬黎捐款醜聞、調查超過三年嘅貪曾「貪盡海陸空、歎盡省港澳」貪腐案，律政司同樣對檢控歎慢板、議而不決，難為袁國強仲義正詞嚴，夠膽話法治係民主重要基礎。袁國強喺訪問中仲提到，律政司司長「作出每一個重要的決定都不容易」，最終都係有兩個標準，一個係法律，另一個係香港整體利益。一句「決定不容易」，莫非就要無限期拖延？抑或係怕咗外國勢力唔敢檢控呢？如果處理案件咁拖泥帶水，先係對香港法治最大嘅破壞！
